Nag-abot na sini nga aga sa ciudad sang Bacolod ang asawa sang isa sa mga biktima nga napatay sa sunog nga natabo sa Java Pension House sang nagligad nga Martes, November 26 sa dalan Locsin-Gonzaga, Bacolod City.
Si Evelyn Bajenting upod ang ila tatlo ka mga kabataan ang nag-abot halin sa Cebu agud personal nga kilalahon ang bangkay sang iya bana nga si Arniel Bajenting, ahente sang isa ka hardware company.
Suno sa asawa nga kabahin sang trabaho sang iya bana bilang salesman amo ang paglibot sa nagkalain lain nga mga lugar kag naga check-in lang kon diin ini ma-destino.
Ginpahayag ni Evelyn nga masubo para sa ila pamilya ilabi na gid kay nagahilapit ang paskwa kag nadulaan pa sang amay ang ila mga kabataan.
Madumduman nga sang natabo ang sunog sa Java Pension House anum ang nagkalamatay nga ginlakipan mismo sang tag-iya sang pension house nga si Christopher Java kag ang iya bata nga si Miguel Java, 12 anyos.
Napatay man sa amo nga sunog si Ronalyn Dacallo, 44 anyos, taga Bago City, yaya ni Miguel kag ang iloy ni Christopher nga si Magdalena Java lakip na ang cashier nga si Arnold Filomino, 54 anyos, residente sang Bago City.
[image: image.png]
