General Santos City–Hingpit nang napasakaan ug kasong murder ang Auxiliary Police nga nakabasi sa Glan, Sarangani Province nga si Alip Diabal, 53 anyos nga taga Burias, Glan kansa suspek sa pagpatay sa batan-ong si Kiven Aray, 22 anyos, residente sa E. Aligado, Glan, Sarangani niadtong nakalabayng adlaw.
Matud ni Police Major Rey Salgado, Hepe sa Glan PNP, kasong murder ang ilang gipasang-at batok sa suspek.
Sa karon nagpabiling At large si Diabal ug padayon pa nilang ginamonitor ang nahimutangan niini. Kahinumduman nga gipusil sa suspek ang biktima dihang siya ihatod unta ni Aray sa iyang gipuy-an.
Dili sigurado si Major Rey Salgado kung anaa pa sa lungsod sa Glan ang suspetsado.
Matud niini nga dunay mga impormasyon nga anaa pa sa Lungsod sa Glan ang suspek, apan aduna usab mga impormasyon nga nanggawas nga nakasibat na gikan sa lungsod ang nasangpit.
Gisaad nalang ni Salgado nga dili sila moundang sa paggukod sa suspek ug andam sila nga kini dakpon higayon nga mogawas na ang iyang warrant of arrest.
