BACOLOD CITY – May nahuman na nga agreement sa tunga sang customer nga nagreklamo nga gamay ang lechon nga iya nabakal sa Avelino’s Lechon sa Brgy. Singcang Airport, Bacolod City.
Ini ang ginpalab-ot sang complainant nga si Cristy Joy Yanson Escarcida sang Brgy. Bata, ciudad sang Bacolod sa DYHB pinaagi sa pagpadala sang text message.
Sa iya mensahe, ginsiling ni Escarcida nga may kasugtanan siya nga ginpirmahan upod sa Avelino’s lechon rason nga indi na siya makapagwa pa sang dugang nga statement angut diri.
Sang nagligad nga Enero 10 las 10 sang aga sa Department Trade and Industry (DTI) ginpatigayon ang mediation sa reklamo ni Escarcida.
Ang importante lang suno kay Escarcida nga na-settle na ang iya reklamo kag nagpa salamat sa bulig nga nahimo sang DYHB.
Madumduman nga nag trending sa social media ang reklamo ni Escarcida matapos niya ginpost ang picture sang iya ginbakal nga lechon sa Avelinos sadtong December 31 nga suno sa iya, tuman ka gamay para sa presyo nga 4 mil pesos.
Ang ginhimo ni Escarcida ang nagtuga man sang kaugot sa tagdumalahan sang Avelino’s gani natabo ang sinabtanay kag mga akusasyon sa tunga sang customer kag manugbaligya.
Apang, kahapon nga adlaw, ginpabalo sang customer nga complainant nga na settle na ang ila issue kag nalipay siya sa resulta./dyHB BACOLOD
