BACOLOD CITY – Patay man ang isa ka AWOL nga pulis matapos nga nagbato sa ginpatigayon nga drug buy bust operation sini lang nga kaagahon sa Brgy. 20, Bacolod City.
Nakilala ang suspek nga si anay PO3 Richard Dollosa, legal ang edad, tumandok sang banwa sang Binalbagan, sadto assigned sa Candoni Municipal Police Station kag ginsaylo sa NOCCPO.
Ang buy bust operation ginpatigayon sang mga katapo sang City Drug Enforcement Unit sang Bacolod City Police Office mga las 4 sini gid lamang nga kaagahon sa Purok Avocado, Brgy. 20.
Suno sa utoridad, nagbato ang anay pulis sang ini ang hana na nga dakpon rason nga napilitan ang mga katapo sang CDEU nga ini siya ang tiruhon.
Wala labot kay Dollosa, nadakpan man sa amo nga buybust sanday Jessie Consingco kag Paul Chavez, lunsay pumuluyo sang ciudad sang Bacolod.
Narecover sa mga suspek ang 5 ka sachet sang suspected shabu kag isa ka libo ka pesos nga cash.
Nag-angkon sang fatal nga igo sa iya lawas si Dollosa kag gindala pa kuntani sa Corazon Locsin Montelibano Memorial Regional Hospital apang ini ang gin-declare dead on arrival./dyHB BACOLOD
