General Santos City—Patay ang usa ka babaye nga nailang si May Sheila Garingo, 27, residenti sa Purok 2, Barangay Conel, Gensan human kining gipusil sa wala pa mailhing suspek alas 8:30 ang takna sa gabie didto mismo sulod sa ilang compound.
Subay sa inisyal nga imbistigasyon sa kapulisan, nasuta nga mao pay pag-abot sa biktima sa ilang compound dihang kalit kining giduol sa wala mailhing suspek dayon gipusil igo sa iyang nawong nga bahin.
Paspas nga misibat ang suspek sakay sa usa ka motorsiklong gahuwat dool sa nahitabuan sa krimen.
Sumala sa uyab sa biktima nga ayha nahitabo ang pagpatay, nag-uban pa sila sa iyang uyab, iya pa kining gihatod sa ilang balay apan nakatalikod lang siya dihang gipusil na ang nasampit.
Gibutyag usab niini nga ayha ang krimen duna nay nasulti kaniya ang biktima nga adunay dawsa nagbahad kaniya. Nasayran nga nahimong agent kaniadto ang biktima sa usa ka investment scheme nga una nang naga-operate sa Gensan.
Sa karon ang kapulisan ginasuta pa ang motibo sa maong krimen ug ginaila pa ang suspek nga responsable niini.
