South Cotabato–Gikumpirma ni Police Major Nathaneil Panaguiton ang labaw sa Lake Sebu MPS nga nakagawas na sa ilang kustodiya ang suspetsadong si Josephine Villarosa human kining nakabayad ug piyansa sa kasong giatubang niining estafa.
Sumala pa sa opisyal nga una na nilang napasakaan ug kasong estafa ang nasampit nga suspek kansa una nang nasikop human nagpaila nga staff sa University Of Southeastern Philippines (USEP) Davao nga gapangilad ug mga tawo sa Lake Sebu, South Cotabato.
Saysay ni Panaguiton nga una nang midangop sa ilang buhatan ang biktima gumikan kay residente ra usab kini sa lugar nga duna matud pay tawo nga naga-offer ug masters degree program sa nasampit nga tunghaan bugti ang kwarta.
Dugang pagbutyag ni Police Major Nathaniel Panguiton nga malamposon gayud nga nakahatag ug kwarta ang biktima nga gitago lang ang pangalan niini sa suspek nga nagkantidad ug P110,000.00 human nga nailad sa gitanyag niining master degree program sa nasampit nga tunghaan.
Gipaklaro usab sa opisyal nga ilahang gi-verify sa nasampit nga tunghaan ug namapatud-an nga dili konektado ang suspek ug peke ang mga transaksyon niini, inungdan nga gikasa sa otoridad ang entrapment operation human nga nangayo na usab ug dugang bayad ang suspek sa biktima.
Malamposong kining nasikop apan sa kasamtangang nakagawas na kini sa prisohan human nakabayad ug piyansa. (Reynald Timario)
