BACOLOD CITY – Nangin madinalag-on kag malinong ang pagbukas sang Bacolaodiat Festival 2018 para sa pagsug-alaw sang Year of the Dog kahapon.
Sa report nga ginpagwa sang Bacolod City Police Office, ginsiling sini nga nangin zero incident ang una nga adlaw sang kahiwatan nga ginsugdan pinaagi sa Bacolaodiat Grand Parade halin sa Bacolod City Public Plaza pakadto sa South Capitol Road kahapon sang hapon.
Suno sa BCPO nga bangud sang pagtinguha, suporta kag koordinasyon sang Task Force Bacolaodiat 2018 nangin successful ang pagbukas sang aktibidad.
Samtang, ginpasiguro sang BCPO nga sa pagpadayon sang festival, padayon man nga mangin alerto ang pulis pinaagi sa hugot ga pag-coordinate sa iban pa nga natungdan nga ahensya.
Angut sini, ginahingyo sang BCPO ang suporta, paghangup kag kooperasyon sang pumuluyo para sa kadlag-an sang Bacolaodiat./dyHB BACOLOD
