Iga-swab test na subong nga adlaw ang doktor sang Corazon Locsin Montelibano Memorial Regional Hospital (CLMMRH) nga nakasalamuha sang isa sa mga doktor sang St. Paul’s Hospital sa ciudad sang Iloilo nga nagpositibo sa coronavirus.
Sa interview sang DYHB kay Dr. Julius Drilon, Medical Director II sang CLMMRH, ginsaysay sini nga ang doktor sang regional hospital nga nakasalamuha sang mga COVID-19 positive ang tumandok gid sang Iloilo kag nagbisita ini sa iya pamilya kag girlfriend nga doktor man sang St. Paul’s Hospital sang Hunyo. 26.
Sang Hunyo 27 naman, nagpanyaga ang nasambit nga doktor upod sa iya classmate sa medical school nga sang ulihi nahibaluan nga positibo sa virus, apang wala siya nakahibalo nga nakuhaan na ini sang swab antis sila nagpanyaga. Sang nagbalik na sa Bacolod ang doktor nakapatigayon pa ini sang operasyon sa regional hospital sang Hunyo 28, apang sang nahibaluan niya sang hapon sa amo nga adlaw nga positibo sa coronavirus ang iya classmate, nag-isolate na ini sang iya kaugalingon.
Sa karun, lima pa ka mga doktor kag isa ka nurse nga na-close contact sini ang gin-isolate man kag kuhaan man sang swab sample, lakip naman ang pasyente nga gin-operahan sang amo nga doktor.
Ginapasiguro naman ni Dr. Drilon nga manubo ang risgo sang pasyente sa virus bangud nakasuksok sang Personal Protective Equipment (PPE) ang natungdan nga doktor sang ini ang nagpatigayon sang operasyon.
[image: image.png]
