BACOLOD CITY – Ginpahamtang karon sa Alert Level 1 ang City Disaster Risk Reduction and Management Council – CDRRMO sang ciudad sang Bacolod bangud sa padayon nga pagbubo sang ulan sini nga adlaw.
Ginpahayag ni CDRRMO Cluster Head Joemarie Vargas nga napabalo na nila sa mga kabarangayan sa ciudad nga malapit sa suba kaangay sang Lupit kag Magsungay nga mag-aligmat sa pagtupa sang mabunok na ulan.
Ini agud nga makahanda sa posibilidad nga masulit ang flashfloods nga natabo pila ka semana na ang nakaligad nga nagtuga sang daku nga epekto sa halos tanan nga bahin sang Bacolod.
Wala labot sini, ginabantayan man ang sitwasyon sang mga suba nga magahalin sa banwa sang Murcia kag ciudad sang Talisay.
Sa pihak nga bahin, suno kay Coastguard Head Lt. Commander Jimmy Oliver Vingno kanselado na ang biyahe sang mga fast craft vessels, magluwas lang sa Weesam Express halin sa Bacolod City pakadto sa Iloilo, vice versa bangud man sang Gale Warning sang PAG-ASA dala sang ma-madlos nga hangin.
Kanselado man ang byahe sang pumpboats sa Pulupandan-Guimaras, Valladolid-Guimaras, Victorias City-Ajuy, Cadiz City – Bantayan, Escalante City-Cebu kag bisan pa ang mga Ro-Ro San Carlos City -Toledo.
Samtang nagapadayon naman ang biyahe sang Ro-Ro vessels Bacolod – Dumangas.
