BAG-O NGA OBISPO | Msgr. Galbines: Paghigugma sang Diyos rasun nga ginpili siya bilang Obispo sang Kabankalan

1656

BACOLOD CITY – Nagbatyag sang kakulba kag halos indi makapati nga siya ang igapahamtang bilang bag-o nga obispo sang Diocese sang Kabankalan.

Ini ang reaksyon ni Monsignor Louie Galbines sa exclusive interview sang dyHb matapos gin-anunsyo kahapon ang pag-appoint sa iya ni Pope Francis bilang Obispo sang Kabankalan, bulos kay Bishop Patricio Buzon nga ginsaylo naman sa Diocese sang Bacolod.

Suno kay Msgr. Galbines nga apesar indi na gid man sorpresa ang announcement bangud nga sadtong March 4 pa nakahibalo na siya angut sa iya appointment, apang sa gihapon nagbatyag ini sang kakulba bangud sang daku nga responsibilidad nga iya atubangon.

Apang, nagapati si Galbines nga ang daku nga paghigugma sa iya sang Diyos ang rason kon ngaa ini ang ginpahamtang sa amo nga pwesto.

Ginpahayag pa sang bag-o nga Obispo nga ini man ang nagapabakud sang iya convinction para sa pag-uyat sang panibag-o nga responsibilidad sa Diocese sang Kabankalan.

Sa karon, wala pa sang natalana nga petsa sang iya installation bangud ma damo pa sang discussion kag paper works nga pagapatigayunon.

Posible, suno kay Galbines ini ang matabo sa sulod sang duha ka bulan ukon sa tunga sang Mayo kag Hunyo.

Si Galbines, 51 anyos, ang tumandok sang Sagay City kag nagtapos sang iya Philosophical and Theological Studies sa University of Santo Tomas sa Manila.

Ini sya ang una gina-ordinanhan bilang isa ka pare sa Diocese of Bacolod sadtung April 29, 1994.

Si Msgr. Galbines ang nag-serbe man nga Deputy Dean kag Spiritual Director sang Sacred Heart Seminary sa Bacolod City subong man nangin Chancellor kag Secretary sang Diocesan Curia of Bacolod halin 1994 tubtub 1996./dyHB BACOLOD

Facebook Comments