Davao City – Gilauman sa mga mosunod na tuig nga ubay-ubay ka mga hotels ang pagaabrihan aron mu-akomodar sa mga turista ug mga bisita dinhi sa syudad sa Davao.
Subay kini sa bagohay lang nahuman ug nagmalampusong 33rd Kadayawan Festival.
Sumala ni Kadayawan festival director Gatchi Gatchalian bisan pa man ginapinalisar pa nila karon ang datos, mas taas matud pa ang numero karon sa mga turista ingon man sa mga lokal nga miapil ug nakigduyog sa pangilin karong tuiga itandi sa milabay’ng tuig.
Gani gipasalamatan niini ang mga indibidwal nga nitabang sa information dissemination bahin sa Kadayawan Festival.
“I guess, it was successful dahil na-communicate din natin outside Davao (about Kadayawan) because we had an early marketing campaign, hence, we gathered lots of visitor,” segun niini.
Dugang ni Gatchalian nga ‘very successful’ ug ‘worth it’ ang gastos sa maong festival diin matud pa naka-ipon sila og kapin P35 million gikan sa mga pribadong sector diin P22.5M ang in cash ug P13 million ang in kind lakip na ang airfare ug akomodasyon sa mga hurado ug uban pang mga bisita.
Lauman usab sa katapusan sa bulan sa Agosto adunay mahinayong ‘Pasasalamat’ diin ibutyag dinhi ang mga opisyal nga resulta ug uban pang statistics sa maong selebrasyon pinaagi sa festival executive committee.
RadyoMaN Jason Amisola
