Bag-ong laya nga nalambigit sa iligal nga druga subling nasikop sa mga otoridad!

Posas ang gidangatan sa suspek sa pagpamaligya sa iligal nga druga. / Photo By: RadyoMaN Andy Coco

Subling nasikop sa mga otoridad ang usa ka lesbian nga bag-ong laya tungod sa pagkalambigit sa iligal nga druga.  Kini human sa anti-illegal drug buy bust operation nga gilusad sa mga operatiba sa City Drug Enforcement Unit kon CDEU kagahapon diha sa Sentro Kulambog sa Brgy. Lapasan ning syudad sa Cagayan de Oro.

Nasayran ang maong operasyon ang gipangulohan ni CDEU Asst. Chief PCapt. Mike Dioren Cavan ubos sa direct supervision ni CDEU Chief PLt.Col. James Gaylan alayon na sa mga personahe gikan sa TSC RMFB 10 ubos ni Company Commander PMaj. Excyllo Alcantara.

Tungod ni-ini malampusong nasikop ang 26 anyos nga si Cathrina Galorport, lesbian nga walay trabaho ug residenti kini sa nasangpit nga lugar.  Napalitan sa usa ka sachet sa gituhoang shabu ang suspek balor 200 pesos nga maoy hinungdan sa iyang pagka-aresto.


Nahibaloan nga kanhi nang napriso ang maong suspek tungod sa pagkalambigit sa druga ug nakalaya kini niadtong bulan sa Nobyembre sa nakalabay’ng tuig.  Apan mibalik kini sa iligal nga binuhatan sulod sa duha ka bulan ug kagahapong adlawa subli kining nasikop sa mga otoridad.

Nakuha gikan sa posisyon ni-ini ang laing duha ka mga sachet sa gituhoang shabu nga gisulod ni-ini sa coin purse, duha ka cellphone, lighter ug ang 200 peso bill nga ginamit isip buy bust money.

Gibana-banang motimbang sa 0.7 grams ang tanang kontrabando nga nakuha sa suspek kung dunay street market value nga halos 5,000 pesos.

Ang suspek karon detinado na samtang giandam na ang kasong pagsupak sa RA 9165 nga atubangon ni-ini ngadto sa korte.

Kasama mo sa CDEU, RadyoMaN Andy Coco, DXCC Tatak RMN!

Facebook Comments