General Santos City–Ipadayon lang sa bag-ong labaw sa Sarangani Provincial Police office nga si Police Col. Efraim Corpuz Curat ang mga nasugdan sa kanhing labaw sa SPPO nga si Police Col. Abul Kyer Macalancom kansa gipulihan na sa pwesto sa nakalabayng simana.
Matud ni Police lt. Col. Teody Condesa, gisulti kanila sa ilang bag-ong labaw nga iya lang ipadayon ang mga maayong programa ni Macalamcom.
Usa sa derektiba niini sa kapulisan sa Sarangani nga pahugtan ang gipatumang seguridad hilabi na sa mga check point ug sa tanang pampublikong lugar sa Sarangani aron nga dili basta-bastang malutsan sa dautang elemento nga buot maghimo ug kasamok.
Dugang pagbutyag ni Condesa nga usa usab sa mando ni Police Col. Corat ang pagpahugot sa seguridad sa tanang kwerpo sa kapulisan.
Tumong niini aron nga dili matud pa mahimong soft target unya sa mga armadong grupo nga buot manabutahe sa ilang han-ay.
Gawas niini gimando usab ni Curat ngadto sa iyang mga ginsakpan nga palig-unon ang Police Visibility ingon man mahugtan ang intel monitoring aron nga mamonitor ug sakto ang lihok sa mga criminal nga anaa sa ilang palibot.
