Nanumpa atubangan ni National Commission on Indigenous People (NCIP) Chairman Allen Capuyan, si Ferdausi Cerna ang bag-ong natudlo nga Regional Director sa NCIP dinhi sa Caraga region.
Sa interview sa RMN DXBC Butuan, gibutyag ni Dir. Cerna nga opisyal nga magsugod siya sa iyang trabaho ugmang adlawa, Biernes Agosto 9, 2019 tunong mismo sa kasaulogan sa International Indigenous People (IP) day.
Sa unang adlaw sa pagserbisyo sa NCIP, nakatakda siya’ng makigtagbu sa tanang mga IP leaders, Datu sa tribu, kababayen-an sa tribu ug mga empleyado sa nasangpit nga buhatan nga dayag mihatag ug suporta kaniya isip bag-ong regional director sa komisyon.
Misaad si Dir. Cerna nga iyang paminawon ang tanang mulo, reklamo ug problema sa mga lumad aron maoy basihan unya sa iyang panerbisyo.
Aminado ang opisyal nga molungtad ug taas nga proseso ang pagsulbad sa nag-unang problema sa mga lumad sama sa yutang kabilin, seguridad batok sa rebelding New Peoples’ Army (NPA), royalty share sa operasyon sa mina ug daghan pa.
Ipatuman usab ni Dir. Cerna ang kamandoan gikan sa Chairman Capuyan nga ibalik sa ilang “mother unit” ang tanang mga empleyado nga kasamtangang nagtrabaho sa rehiyonal nga buhatan.
[image: FERDI TRIBU final.jpg]
