BACOLOD CITY – Natigayon nga madakpan ang duha ka mga ginakabig “newly identified” nga mga drug suspek sa ginpatigayon nga buy bust operation kahapon sang joint team sang Police Station 2 kag City Drugs Enforcement Unit sa Purok Sigay, Brgy. 2, Bacolod City.
Ang mga suspek nakilala nga sanday Marwin Navarro, alyas Tong-it, 18 anyos ang edad, residente sang Brgy. 2 kag si Sheddah Apawan, 32 anyos, pumuluyo sang Calamba St., sining ciudad sang Bacolod.
Suno sa police, nakuha sa ila nanday Navarro kag Apawan ang pito tanan ka sachets sang ginapatihan Shabu nga nagabalor 105 mil pesos.
Ginpahayag sang hepe sang Drug Enforcement Unit S/Insp. James Albaytar nga ginakabig nila nga bag-o nga mga drug personalities ang duha.
Ini sila ang natalana nga pasakaan sang kaso sang kaso nga pag-violate sang RA 9165 ukon Comprehensive Dangerous Drug Act of 2002./dyHB BACOLOD
