Davao City – Muabot sa 769 ka pamilya, sagad nanimuyo sa coastal areas sa Governor Generoso (GovGen), Davao Oriental ang gi-evacuate tungod sa hulga sa storm surge epekto sa Bagyong Maring, ang ika-trese (13) nga bagyo nga misulod sa nasud karon nga tuig, 2021.
Samtang, usa ka fishing vessel ang nabanlas sa baybay sa Barangay Tibanban, GovGen ug 24 ka balay ang partially damaged tungod usab sa kusog nga hangin ug balud epekto sa bagyo niadtong Domingo (October 10, 2021).
Sa interbyu sa DXDC RMN Davao kang Police Captain Ramil Rivera, officer-in-charge sa GovGen Municipal Police Station nga subay usab sa report sa Provincial Disaster Risk Reduction and Management Office (PDRRMO) Operation Center, walay reported injured o casualty tungod sa insidente apan adunay na-damage nga balay ug mga bangka.
“Ako lang nahibal-an nga kagabii sa kusog nga balud sa pipila ka mga barangay nga naigo gahapon sa balud, naay mga na-damage nga mga fishing boat,” saysay ni Rivera.
Matud ni Rivera, nakabalik ra usab sa ilang mga balay ang mga apektadong residente human nga mibalik sa normal ang panahon.
Bisan pa man niini, hugot ang koordinasyon sa PDRRMO ngadto sa Municipal Disaster Risk Reduction and Management Office (MDRRMO) sa GovGen ug San Isidro nga maoy apektado sa bagyo.
RadyoMaN Kirby Manzon
