Gipasalig ni Mayor Oscar Moreno nga wala nay mahitabong bagyong sendong dinhi sa syudad sa Cagayan de Oro.
Apan matud sa mayor nga kon mobalik man ang paherong kalamidad, iyang gipaniguro nga wala nay kinabuhi nga mabiktima sa baha ning syudad.
Kini ang gibutyag sa Mayor, niining ika pito ka tuig nga anibersaryo sa bagyong sendong kagahapong adlawa.
Matud ni Moreno nga sakit unta hinumduman ang grabing kada-ot sa bagyong sendong, apan mao ra kini ang pamaagi aron ang gobyerno ug ang katawhan ning syudad sa Cagayan de Oro magbantay sa tanang panahon aron dili mabiktima sa ataki sa baha.
Mahinumduman nga niadtong Disyembre 17, 2011, namatay ang kapin sa usa ka libo ka mga tawo sa Cagayan de Oro ug Iligan City ug na-wash-out ang daghang mga balay ug naanod padulong sa dagat tungod sa baha nga dala sa bagyong sendong ug wala pay labot niiini ang mga tawong missing nga wala pa gihapon makita hangtud sa pag-report ning balita.
Matud ni Moreno nga dili na mahitabo ang mga kadaot kon subling mahitabo pa ang baha ning syudad tungod sa multi million peso nga Flood mitigation Program, sama sa construction Flood Control Project sa suba Cagayan de Oro ug mga dagkong drainage system nga gi-trabaho sa DPWH.
Gibutyag ni Moreno nga ang kadaot nga nahitabo sa milabayng bagyong sendong, mao kadto ang timaan nga napakyas ang gobyerno sa Cagayan de Oro niadtong panahona sa paghatag proteksyon sa katawhan tungod kay bisan ang mga lugar nga No build zone area, gitugotan man sa kanhi namunoan ning dakbayan nga puy-an sa mga tawo tungod sa kakulang ug walay plastadong mga relocation sites.
