BAGO CITY, NEGROS OCCIDENTAL – Nagdangat sa kapin 80 mil pesos nga balor sang kagamitan ang natigayon nga makuha sang 5 ka mga armado nga nagsulod sa isa ka balay kag nagpangawat las 8:30 kagab-i sa Brgy. Ma-ao, Bago City.
Ang amo nga puluy-an ang ginapanag-iyahan sang pamilya Laguyo sa Purok Dinapalan, Brgy. Ma-ao, ciudad sang Bago.
Sa amo nga balay naga-istar ang mag-asawa nga Jerry Laguyo, 55 anyos kag Jije Laguyo, 50 anyos upod ang ila tatlo ka mga kabataan nga sanday Michael John, 18 years old, Joven, 21 anyos kag bata nga babaye nga 17 anyos.
Suno kay Jije nga una nagsulod ang 2 ka mga suspek kag nagdeklarar sang hold-up nga amu ang nagsulod sa ila kwarto sa diin atu sila nga tatlo sang iya bana kag bata nga babaye.
Ginsundan sang 3 ka iban pa nga mga wala nakilala nga lalaki nga nakabonet nga amu naman ang nagdala pasulod sa iya duha ka bata nga lalaki kag ginpahapa.
Bangod kay ginatayaan na sila tanan, wala na sila sang may mahimo rasun nga naghambal nalang ang iya bana nga kuhaon nalang ang ila gusto nga gamit.
Ginpang-ukay sang mga suspek ang kagamitan dala ang aparador, ginpangbaliskad ang nga foam sa diin ila nakuha ang iya duha ka kahita, lap top, cellphone subong man ang mga ginpang-grocery sini kahapon sa Libertad agud kuntani ibutang sa ila tiyangge nga balor P1,200.
Nagdangat tanan sa kapin 30 mil ang cash nga nakuha sang mga suspek kag kapin 50 mil naman ang kabug-usan sang mga gamit ang ginkuha lakip man ang shotgun sang iya bana.
Nalipungan pa ang ila bata nga babaye nga may balatian sa korason sang gintayaan ini sang isa sa mga suspek sang pistola sa ulo. Ginbasyahan pa sang suspek sang tubi ang baba sang ila bata sa pagpati nga ini ang nagadrama lang. Apang nagtindog naman ang duha sini ka mga magulang nga bata nga amu ang nag-alay ay sa ila utod nga babaye.
Sang naglakat na ang mga suspek, gilayon nga gindala nila sa ospital ang ila bata nga babaye kag didto nagpahuway sa ospital sa Bago.
Para sa ila, indi gid sila makakilala sa mga suspek bangod sa bonet nga ila ginasuksok kag sa kakulba wala na nila nahimutaran ang mga ini./dyHB BACOLOD
