General Santos City—Usa ang patay samtang upat ang angol sa usa ka pamilya human nga natumbahan ug lubi ang ilang balay sa may sitio Palbang, Barangay Sapu Masla, Malapatan, Sarangani Province alas 11:30 ang takna kagabie.
Biktimang namatay giilang si Lyka Tayal, 3 anyos. Samtang ang mga angol nailang si Setah Tayal, 40 anyos ug mga anak niini nga silang si Jessie Tayal, 13, Olie Tayal, 9 anyos, ug Angelica Tayal, 6 anyos.
Sumala ni Cecil Tayal, Step Daughter ni Setah Tayal nga natulog na ang mga biktima dihang nikalit lang ug katumba ang punuan sa lubi nga anaa tapad sa balay nga mga biktima.
Wasak ang balay nga gama sa light material diin nadat-ugan gyud ang mga biktima nga hinungdan sa kamatayon sa 3 anyos ug maayong pagkasamad sa inahan nga si Setah ug anak niining si Jessie.
Minor nga samad lang usab ang naangkon nilang Angelica ug Olie kansa wala na gidala sa ospital.
Dugang pagbutyag ni Cecil nga kalit ra kaayo ang panghitabo gani niadtong tungura wala sila sa maong lugar uban sa iyang amahan tungod tua matud pa sila sa sentrong bahin sa ilang purok. Pag-uli sa iyang amahan didto nalang nasayran nga nadat-ugan na diay ang mga nasangpit ug punuan sa lubi.
Sa karon ang patayng lawas sa 3 anyos nga nakabsan ug kinabuhi anaa na sa lokal nga punerarya sa Malapatan samtang ang ginang ug ang 13 anyos niining anak nagpabilin pa sa Dr. Jorge Royeca Hospital.
