Padayon karong giimbistigahan sa kapolisan sa Bulua Police Station kung unsay motibo sa wala mailang mga lalaki nga misulod sa balay ni Mrs. Joy Callao, nga taga-Block 19-Lot 11 Phase 2-B, Regency Subdivision, Brgy. Iponan ning syudad kagabii.
Kini ang gibutyag ni PO3 Francis Tumanda, ang inbistigador sa Bulua Police Station kinsa miresponde kagabii, human unang gikabutyag nga nasunog ang balay ni Mrs. Callao.
Nasayran nga sa wala pa nadiskobre sa kapolisan ug Bureau of Fire Protection nga gisulod sa gituhoang kawatan ang balay sa biktima, unang nadiskobre sa mga silingan nga nag-aso ang kwarto nga portion sa maong balay ug nanimahong sunog.
Tuod man, napamatud-ang adunay nasunog sa sulod nga bahin sa balay ni Callao, human nga nakit-an sa usa ka Dodong nga nag-aso ang usa ka kwarto sa maong balay.
Gumikan niini, gilayong nangayog tabang si Dodong hinungdang ang ilang silingang sundalo, ang misulod sa maong balay aron pagsusi ug nadiskobre nga wala kini tawo.
Samtang……
Nanawag gilayon sila sa Bureau of Fire hinungdang miresponde dayon sa dapit ang mga bombero sa Bulua, Kauswagan ug Carmen substation.
Ug sa ilang pag-abot ilang nadiskobreng ang cabinet lamang sa guest room sa maong balay ang nasunog, apan nagkatag na ang mga sinina sa maong kwarto daw sa giransak kini.
Gumikan niini, nagtuo ang tag-iya nga giransak ang ilang balay ug posibling gisulayan sa pagsunog.
Sa pagkuha ning balita, wala pa masayod ang kapolisan sa Bulua kung aduna bay nawalang butang sa maong balay tungod kay nagpadayon pa ang ilang imbistigasyon.
Samtang, wala pa usab gibutyag sa BFP kung pila ang damyos sa maong sunog ug kung unsay hinungdan niini.
