Tagtugutan na bag-o pa lamang kuman udto an pagpabiyahi sa Phil. Coastguard sa mga lancha na magbiyahian pasingod sa Siargao sanan Dinagat Island. Ini human na waya tugoti kahapon sa buntag sanan gainan sajo an mga lancha na magbiyahi tungod sa kadagko nan bayud sanan makusog na hangin sanan uyan epekto sa Bagyong si Paolo.Hinuon an mga gagmay na sakyanang pandagat an tagpahimangnuan nan Phil. Coastguard na dili anay molawig o mobiyahi para malikayan an aksidente sa kadagatan. Kahinumduman na isa ka pumpboat an nalunod kahapon na adlaw sa may alas 9:40 sa buntag tungod sa pagbiyahi nan ini sa kadagatan suod sa Basul Island sakop sa Brgy. Lipata inin syudad. Hinuon naluwas ra an nagsakay na mangingisda na tagkilaya na si Roberto Moreno,58 anyos taga brgy. Alang Alang, Surigao City
