Gipahigayon karung adlawa sa Iligan City Division sa Department of Education, ang Balik Eskwela 2019 kickoff program sa Ubaldo D. Laya Memorial Central School, isip encouragement ug pahimangno niini sa mga external ug internal stakeholders sa ahensiya nga makighiusa niining tinuig nga aktibidad.
Inubanan sa puwersa sa lokal nga kagamhanan, National Government Organization, National Government Agency, pribadong sektor ug tulunghaan, ug mga opisyal sa DepEd, giemphasize sa programa nga kining responsibilidad ngadto sa kalidad nga edukasyon, dili lamang usa ka butang nga masolo ug sagubang sa ahensiya.
Matud pa ni Chief Education Program Superintendent sa School Governance and Operation Division nga si Dr. Juliet Timbang, kining pagpahigayon ug Balik Eskwela usa ka pagtimbayayong sa mga stakeholders arun mapreparar ang atong mga tulunghaan sa ting-abli sa klase.
Dugang pamahayag pa niya, tanang resources gikan niining mga stakeholders — ma oras man, kuwarta, manpower, o bisan unsa, magsilbi nga inspirasyon ngadto sa tanan nga mutabang alang sa ikanindot sa atong tulunghaan. Alang sa impormasyon sa tanan, kini atong tinuig nga balik eskwela kay parte niini atong DepEd Memorandum no. 36 kung aha gihimong mandatory ang pagpahigayon niini.
Gawas sa mga district ug Education Program supervisors, ingon man opisyales sa nagkalain-laing ahensiya, gitambungan sad ang programa sa Chairman sa Committee of Education nga si City Councilor Noli Pardillo ingon man ni City Councilor Sol Bacsarpa.
Matapos ang Balik Eskwela sa Sabado samtang sa Hunyo tres, opisyal nang buksan ang klase sa mga pribado ug publikong tulunghaan. (RadyoMan Jhanalodin Dipantar)
