BACOLOD CITY – Balik normal na ang byahe sang mga pumpboats kag fastcraft sumugod las 5 subong nga hapon matapos nga kaina gin-cancel ang biyahe sang duha ka mga barko sang duha man ka fastcraft company nga naga biyahe Bacolod-Iloilo.
Ini kasunod man nga ginlift na sang Pagasa ang Gale Warning nga gin-issue sini kaina las 5 sang kaagahon.
Suno kay hepe sang Philippine Coast Guard sa Bacolod nga si Lieutenant Senior Grade Officer Jimmy Oliver Vingno, kanselado kaina ang biyahe sang tanan nga passenger vessels kag motor bangka nga manubo sa 250 gross tonnage.
Ginpahayag ni Vingno nga ang wala ginpahanugutan nga maka biyahe amo ang barko sang fastcraft nga Supercat kag ang isa ka barko sang Ocean jet bangud nga ini ang manubo sa 250 gross tons.
Samtang, magapadayon naman ang biyahe sang Weesam kag tanan nga mga Ro-ro vessels apang magadepende ini gihapon sa aviso sang Pagasa kon maglain pa gid ang panahon.
Kanselado man kaina ang byahe sang pumpboats sa Pulupandan-Guimaras, Valladolid-Guimaras, Victorias-Ajuy kag Cadiz City-Bantayan Cebu.
Ang masunod nga Gale Warning ang ipaguwa las 5 naman bwas sa aga./dyHB BACOLOD
