Balik normal na an operasyon sa puerto o pantalan nan Surigao human tagtapos na sa Union Dockworkers Association an ila 44 diyas na welga sanan strike kagaina buntag . Ini amuy na desisyunan sa mga nagwelga human isab sila tagpatawag sa kadumayahan nan PPA sa pagpanguyo nan Acting PPA PSD Manager Atty. Roldan Calejesan sanan nasabutan na kasamtangan anay an PPA amuy motake over sa pagdumaya sa operasyon sa puerto samtang waya pa matapos an bidding sa musunod na modumaya nan arrastre. Sumaya pa ni Atty Roldan Calejesan na nasabutan isab sa tigum tali sa mga sakop sa Union Dockworkers na i-pull out na an ila mga tagharang sa atubangan nan gate sa pantalan para balik normal na dajon an operasyon sa pantalan sugod kagaina buntag. Nanawagan isab kuman an kadumayahan nan PPA sa tanan mga negosyante na ibalik na an ila transaksyon sa pantalan tungod kay balik na sa normal an operasyon nan ini. Kon ato kahinumdoman nahimong problema sa mga negosyante an amu na welga tungod kay didto sila nagpakarga sa ila mga cargoes sa Nasipit Port sanan sa Lipata Port. (RadyoMaN Jerson Fuentes)
