Davao City – Karon pareho nang nahukasan sila Senador Koko Pimentel ug Congressman Pantaleon Alvarez sa pagkapangulo sa Senado ug pagka-House Speaker sa Kongreso.
Hayan mahuyang na ang gipasilungan nga political party ni Pangulong Rodrigo Duterte sa nakalabay nga piniliay nga mao ang PDP-Laban party karon nga wala na sa gahum sila si Pimentel ug Alvarez.
Daghan sa mga politiko nga una nang mibalhin sa PDP-Laban sa miaging mga buwan muambak sa laing partido partikular sa grupo karon ni House Speaker Gloria Macapagal Arroyo.
Apan alang kang Mindanao Caucus Convenor Candido Aparece Jr., angay did-an ang mga politiko nga magbalhin-balhin og laing partido aron dili matawag nga ‘politically immature.’
Dili malimod nga daghan sa mga politiko sa nasud walay baruganan ug prinsipyo sa partido nga ilang gipasakupan diin kung asa sila makabenepisyo didto pod sila mupasilong.
Busa panahon na aron himoong balaud ang Political Party Development Financing Act aron palig-unon ug pundohan ang mga political parties gikan sa buhis sa katawhan.
Sa ingon niana way mga politiko mag-alimpungad sa pribadong mga kompanya ug sa mga oligarkiya aron mangayo og suporta pinansiyal alang sa ilang kandidatura panahon sa piniliay.
Aron hingpit nga mapapas ang posibleng manipulasyon sa usa ka pamilya sa panggamhanan, gikinahanglang ipatuman na sa nasud ang anti-political dynasty regulations.
RadyoMaN Joel Viray
