Balitang Dugtungan, Una, Balita gikan sa RMN Davao:
Davao City ika-siyam nga bilyonaryo sa nasud
Davao City- Mas nadasig pa ang lokal nga kagamhanan sa siyudad sa Dabaw sa pagkayod karon nga subli giila ang Davao City isip usa sa mga pinakadato nga dakbayan sa tibuok Pilipinas.
Subay sa Commission on Audit Record 2017, ang Davao City anaa sa ika siyam nga pwesto isip bilyonaryo nga siyudad sa nasud nga dunay 13.18 bilyones ka pesos nga asset ug nag-inusarang pinaka-adunahan nga dakbayan sa Mindanao.
Ug tungod niini mas paningkamotan pa og maayo ni Mayor Inday Sara Duterte-Carpio nga magpabilin sa listahan sa mga adunahang siyudad sa nasud ang Davao City sa umaabot pa nga mga katuigan.
Niini, tinguhaon sa mayor nga makagawas sa utang ang siyudad ug maka-iktad sa kalisod ang ubang mga Dabawenyo gikan sa kakabos nga basehan aron ilhong adunahang dakbayan sa nasud sa sunod pa nga mga katuigan.
Gibutyag ni ABC President Edgar Ibuyan Sr nga ang paglangkob sa Davao City sa mga pinakadato nga dakbayan nagpakita lang nga ang liderato sa presidential daughter nahisubay sa sakto nga dalan.
Ang mga bilyonaryong dakbayan sa Pilipinas nag-una ang Makati City nga dunay 196.57 bilyones ka pesos nga asset, gi-sundan sa Quezon City nga dunay 68.33 bilyones ka pesos nga asset, ikatulo ang Manila City ng adunay 38.68 bilyones ka pesos nga asset.
Ikaupat ang Cebu City nga dunay 33.86 bilyones ka pesos nga asset, ikalima ang Pasig City dunay 33.7 bilyones ka pesos nga asset, Taguig City dunay 19.6 bilyones ka pesos nga asset, Caloocan City dunay 17 bilyones ka pesos nga asset.
Ikawalo ang Pasay City nga dunay 16.66 bilyones ka pesos nga asset, Davao City dunay 13.18 bilyones ka pesos nga asset ug Calamba City dunay 12.41 bilyones ka pesos nga asset.
Pikas bahin, gideklara sab ang Probinsiya sa Compostela Valley nga ikaduhang pinakadonahang probinsiya sa nasud nga dunay 18.95 bilyones ka pesos nga assets samtang ikatulo sa most competitive province ang Davao Del Norte alang sa tuig 2017.
RadyoMaN Joel Viray
Balita gikan sa RMN GenSan: 2 ka anak sa pastor, patay sa pagpanunggab sa kapuyo sa ilang katabang
South Cotabato– PATAY mag-igsuon nga 4-anyos ug siyam ka kabulan palang nga bata human nga gidunggab sa kapuyo sa ilang yaya sulod mismo sa ilang panimalay sa Zone 6, Barangay Libertad Surallah, South Cotabato alas-8:30 sa buntag.
Giila ang mga biktima nga silang Alias Cherish 4 anyos ug Jonah Grace, 9 month old, mga anak sa pastor.
Gibutyag ni Police Chief Inspector Lorenzo Henares, chief of police sa Surallah Municipal Police Station nga naglalis matud pa ang suspek nga si George Sodilla, ug ang yaya sa mga biktima.
Milakaw matud pa ang yaya ug gibyaan ang iyang gibantayang mga bata, inay sundan sa suspek ang iyang live-in partner iya na nuong gipahimungtan ang duha ka mga bata ug gipangdunggab nga hinungdan sa ilang kamatayon.
Samtang ang suspek misuway ug pakamatay pinaagi sa pagdunggab sa iyang kaugalingon ug anaa karon sa kritikal nga kondisyon.
Balita gikan sa RMN Butuan: Residente nagreklamo batok BCWD
Usa ka nagpakabanang residenti sa brgy. Ambago ning syudad sa Butuan ang miduol sa RMN DXBC aron ipakita ang “sample” sa tubig gikan sa Butuan City Water District (BCWD) nga lubog ug daghang lapok sama sa nasinati sa pipila ka mga residenti sa syudad.
Gisala nila ang tubig gikan sa gripo apan sa iyang kakurat nakita niya ang daghang balas ug lapok gikan sa salaan ug lubog ang tubig nga nasulod sa ilang container.
Human nasaksihan sa maong Ginang ang hugaw nga tubig, nanumpa kini nga dili na moinom sa tubig gikan sa BCWD sa kahadlok nga makadaot sa panglawas.
Tungod niini, nanawagan ang Ginang sa BCWD nga tarungon ang ilang serbisyo pinaagi sa limpyo ug luwas nga tubig nga ihatud sa mga “concessioners” ilabina nga insaktong sila nagbayad niini matag buwan.
Hangtud karon walay giluwatan nga pahayag ang management sa BCWD kabahin sa daghang reklamo sa mga katawhan.
Balita gikan sa RMN Iligan: Mayor Regencia ug Vice Mayor Vera Cruz makigtagbo kang president Duterte sa Malakanyang aron hisgutan ang problema sa kapulisan sa dakbayan
Aduna nay scheduled karong semanaha sila City Mayor Celso Regencia ug Vice Mayor Jemar Vera Cruz ngadto sa malakanyang aron makigkita ngadto ni Presidente Rodrigo Duterte.
Kini aron ilang maatubang ang presidente sa nasud ingon man si PNP Chief General Oscar Albayalde.
Gibutyag ni City Information Officer Jose Pantoja nga tumong sa lakang nila Regencia ug Vera Cruz ngadto sa Malakanyang mao ang paghisgot labot sa nahimong isyu karon sa dakbayan sa iligan ngadto sa kapulisan.
Kini aron matin-awan ang tanan labot sa kalit nga pagka-relieve sa pwesto ni kanhi City Director Col. Manuel Alvarez.
Balita gikan sa RMN Malaybalay: Release sa 4P’s sa mga na-isyuhan na ug cash card lauman sa sunod semana
Lauman nga sa sunod semana magsugod na ang release sa Pantawid Pamilya Pilipino Programa kon 4P’s.
Sa interview sa RMN Malaybalay ngadto kang Oliver Inodeo, ang focal person sa 4P’s region 10 gibutyag niini nga posibleng sa sunod semana magsugod na ang release sa casd grants alang niadtong mga duna nay cash card.
Gipasabot ni Inodeo nga kamulo pa ang re-carding alang niadtong mga over the counter kaniadto ug uban nadawat na niini ang ilang cash card.
Apan gipasabot niini nga kaniadtong bag-ohay pa lang na proseso sa Land Bank of the Philippines, gipahulat kini tungod kay hapit na usab matud pa mahuman ang pagproseso.
Giklaro niini nga wala nay over the counter nga release kon dili pinaagi na sa ATM.
Tumong matud pa niini nga malikayan ang pagkalangan sa pagrelease sa cash grants sa mga benepisiyaryo.
