Mandatory organ donation, gisupak

RMN Davao City – Maayo ang sugyot nga i-donar ang body organs sa mga nanginahanglan sa higayong mamatay na ang tawo kay makatabang ngadto sa uban.

Matud ni Dr. Gene Gulanes, Davao City Treatment & Rehabilitation for Drug Dependents head, uyon siya niini apan pinaagi sa boluntaryo imbis nga mandatory nga pamaagi kabahin niining gisugyot nga organ donation.

Gibutyag usab ni Gulanes, kung himoong mandatory mawad-an sa iyang katungod ang tawo niini tungod kay adunay mga tawo nga kung mamatay, dili pahilabtan ang ilang patay’ng lawas.

Gi-disrupt nga bag sa Isulan, negatibo sa IED components

RMN General Santos City- Walay nahitabong Improvised Explosive Device o IED detonation sa Isulan, Sultan Kudarat.

Kini ang gipaklaro ni Police Superintendent Aldrin Gonzales, tigpamaba sa Police Regional Office 12.

Matud ni Supt. Gonzales nga basi sa impormasyon gikan sa Isulan Municipal Police Station nga aduna lang usa ka bag nga gibilin rason nga gilayon kining gi-respondihan ug disrupt sa otoridad.

Gibutyag niini nga human gipabuto ang maong bag nasayran nga nag-negatibo kini sa IED components.

Padayon man usab ang panawagan sa kapulisan ngadto sa katawhan nga magpabilng mabinatayon sa palibot ug uns amang makadudahang butang o tawo nga makit-an kini ang gilayong i–report sa otoridad.

Kanhi NPA, mipamatuod dili sila FAKE surrenderee

RMN Butuan City – Gipamatud-an sa usa ka surrenderee nga nalakip sa gipresenta sa 402nd Brigade Philippine Army ngadto ni DILG Sec. Eduardo Año nga tinoud siya nga membro sa rebelding New Peoples’ Army (NPA) kaniadto.

Si alyas Chin-chin, 25 anyos, residenti sa Bayugan City, Agusan del Sur, kinsa nalakip sa 96 ka mga kanhi NPA nga nagsurender sa AFP, ang nahinabi sa RMN DXBC Butuan aron pamatud-an nga bakak ang propaganda sa rebelding NPA batok kanila.

Una’ng gipahayag ni Ka Amihan, tigpamaba sa NPA nga mga yanong mag-uuma lamang ang gipakita sa kasundaluhan ug gipatoo nga mga sakop sa NPA aron mapromote sa ranggo ang mga tag-as nga opisyal sa AFP.

Gisaysay ni alyas Chin-chin nga 22 anyos pa lamang siya sa dihang nadani kini nga mouban sa walhong kalihukan nga nagdala sa pangalang si Ka Maria, ug nagserbisyo siya isip medic nga sakop sa Sandatahang Yunit Propaganda (SYP) sa Guerilla Front Committee 21A, ubos ni Kumander Baltik.

Dugang pa niya nga daku iyang kalipay sa pagsurender tungod kay nakadawat kini ug balor 191,000 pesos nga salapi gikan sa goberno ug maoy gigamit sa iyang panginabuhi karon kauban sa mga minahal sa kinabuhi.

Laing Maute -ISIS remnant ug usa ka miyembro sa NPA, misurender sa militar

RMN Iligan City – Laing remnant na usab sa Maute-ISIS ang mitahan sa militar didto sa lungsod sa Butig, Lanao del Sur niadtong nakalabay’ng adlaw.

Tungod sa iyang seguridad, gingalan lamang kini sa militar sa alyas nga Budo, kinsa matud pa ni LtC. Edgar Allan Villanueva, commander sa 49th Infantry Battalion, Philippine Army, aduna kini kalabutan sa pagpang haras sa usa ka military detachment sa Pantar, Lanao del Norte, Hunyo niadtong nakalabay’ng tuig, isip diversion sa nagpadayun nga giyera sa Marawi City niadtong tungora.

Dungan sa pagtahan ni alyas Budo ang pagsurender usab sa usa ka miyembro sa New People’s Army ngadto sa 10th Infantry Battalion, nga giila lamang sa militar sa alyas nga Jhon-jhon.

Matud pa ni LtC. Ryan Severo, commander sa 10th IB, si alyas Jhon-jhon ang team leader, matud pa, sa Baking, Squad One, Secom Joji sa Western Mindanao Party Committe.

Matud pa sa militar nga ilang siguradahong masulod ang maong mga misurender nga rebelde sa Enhanced Comprehensive Integration Program o ECLIP sa gobyerno.

403rd Brigade, aduna nay bag-ong commander

RMN Malaybalay City – Aduna nay bag-ong commander ang 403rd Infantry Brigade, Philippine Army.

Kini human gipahigayon ang Change of Command ning nakalabay nga adlaw nga gihimo sa Brigade Granstand, Camp Osito D. Bahian, Barangay 10, Malaybalay City.

Gihulipan si Brigadier General Eric C. Vinoya ni Colonel Edgardo Y. De Leon.

Si BGen Vinoya ma-assign sa Visayas alang sa usa ka taas nga posisyon.

Gipangunahan ni 4th Infantry Division Commander MGen Ronald C. ang mao nga change of command ceremony.

Apil usab sa mga nitambong sila si Provincial Governor Jose Ma. R. Zubiri, Jr. PNP 10 Regional Director PCSUPT Timoteo G. Pacleb; PMA “Hinirang” class of 1987 nga gipangunahan ni 6th Infantry Division Commander MGEN. Cirilito E. Sobejana;

Apil usab sa mga nisaksi sa seremnonya ang Commander sa 52nd Engineer Brigade nga BGEN. Dionisio Baudin Jr.; nagkadaiyang Brigade ug Battalion Commanders; Bukidnon PPO officials, Local Chief Executives, nagkadaiyang stakeholders ug uban pa.

Nasayran nga si Vinoya nagsilbi na sa 403rd sulod sa duha ka tuig.