Balita gikan sa RMN Davao: Droga nga nagkantidad sa 21-Million pesos, nasakmit sa Davao Region

Davao City – Gipasidunggan sa Philippine Drug Enforcement Agency XI ang kapulisan sa Davao region ug Task Force Davao sa mga malampusong operasyon kontra iligal nga droga.

Gibutyag ni PDEA XI Regional Director Antonio Rivera nga dako ang nahimong kontribusyon sa AFP ug PNP kanila ilabina sa kakulangon usab sa ilahang mga personahe sa ilang ahensya.

Silbing pasalamat sa PDEA gipangtunulan nila og mga certificates ang ilang mga kaubanang mga ahensya.

Base sa rekord sa PDEA XI gikan Enero hangtod Oktobre karong tuiga, mokabat sa 2.268 kilos o estimated P15, 422,400 ang street value sa mga shabu ang nasakmit sa mga drug operations.

Nag-una ang PNP sa adunay pinakadaghang nakumpiskang mga shabu nga anaa sa 1.273 kilos o nagkantidad sa P8,656,400 samtang 926.47 gramos o P6, 299, 966 sa PDEA operations ug 67.94 gramos o anaa sa P461, 992 kantidad sa shabu ang nakuha sa Task Force Davao sa mga drug suspects.

Samtang, sa susamang period musumada sa 47.959 kilos o P5, 755,080 kantidad usab sa marijuana ang mga nakuha sa mga awtoridad.

Sa PDEA anaa sa 23.215 kilos o P2, 785, 000, Task Force Davao mokabat sa14.643 kilos ug PNP anaa sa 10.102 kilos o P1, 212, 240 ka mga marijuana.

Sa datos sa PDEA XI, 931 ka mga operasyon ang nahimo sa mga operatiba, 1197 ka mga drug suspects ang naaresto, 996 ka mga lalaki ug 163 ka mga babae, 38 mga menor de edad.

41 ang namatay sa maong mga operasyon 26 ka mga drug suspects ang at large ug 1,635 ka kaso ang napasang-at.

Balita gikan sa RMN Gensan: Drug Surenderee, gipusil gawas sa iyang balay, asawa niini nadamay

General Santos City—Patay ang usa ka lalaki samtang angol usab ang asawa niini human nga gipusil sa wala pa mailhing suspek gawas lang sa ilang panimalay sa Purok 5, Barangay Katangawan, Gensan alas 8:15 kagabie.

Giila ang namatay nga si Marco Mangondili, 29 anyos, samtang giila usab ang angol nga si Romela Mangondili, 30 anyos, residenti sa maong lugar.

Sa report sa Police Station 8 nasayran nga samtang anaa atubangan sa ilang panimalay ang mga biktima kalit lang miduol ang suspek dayon gipusil si Marco.

Tungod anaa lang sa tapad niini ang iyang asawa nga si Romela, naigo usab ang nasangpit nga biktima.

Gilayong misibat ang mga suspek sakay sa usa ka motorsiklo nga naghuwat dili layo gikan sa ilang panimalay.

Gilayon usab nga gidala sa ospital ang magtiayon apan gideklara nang dead on arrival ang biktimang si Marco samtang luwas na sa kuyaw nga kahimtang ang biktimang si Romela.

Nasayran nga si Marco kanhi nang mitahan sa iyang kaugalingon sa ilang mga opisyal sa barangay katangawan tungod sa paghilambigit niini sa iligal nga droga.

Sa karon usa sa mga gitan-aw nga anggulo sa PNP sa pagpatay sa biktima ang may kalabutan sa personal grudge ug illegal drugs.

Balita gikan sa RMN Butuan: Publiko, supak sa fare hike

Human gisupakan ang petisyon sa grupo sa transportasyon nga pag-usbaw sa pletihan atol sa gihimung public hearing niadtong adlawng Sabado, daghan usab ang wala nipabor sa maong petisyon sa gihimung online survey sa Department of Transportation (DOTr) – Caraga.

Gipangutana sa DOTr sa ilang online survey kung gikinahanglan ba ang fare hike sa mga Public Utility Jeep (PUJs), nga mokabat sa 2 pesos kada 4 ka kilometro ug 1.75 pesos sa mosunod nga kilometro.

Sukad kagahapon, migawas nga 12% lamang nga mga netizens ang nipabor sa usbaw sa pletihan samtang 88% ang nisupak sa hangyo sa transportasyon.

Unang gipahayag ni Cristina Cassion sa DOTr nga dili basehan sa ilang desisyon ang gidaghanon sa misupak o mipabor sa petisyon kondili ilang tun-an ang daghang mga anggulo adesir ipagawas ang desisyon.

Balita gikan sa RMN Malaybalay: PNP 10, dili manganugon sa pagpapha sa mga pulis nga badlungon

Hugot ang pahimangno sa Police Regional Office o PRO 10 sa mga pulis nga padayon nga nalambigit sa nagkadaiyang binuang sa ilang pagtrabaho.

Sa interview sa DXMB RMN Malaybalay ngadto kang PNP 10 Regional Spokesperson Supt. Surkie Sereñas, gibutyag niini nga daghan nang pulis sa rehiyon nga iyang kauban ang nadismiss na sa serbisyo tungod sa internal cleansing program sa organisasyon sa PNP.

Matud ni Sereñas nga dili sila ma-anugon sa mga badlungong pulis nga tangtangon ilabina og dinaghan na ang ilang gina-recruit gani dili pa lamang dugay mukabat sa 800 ang mga bag-ong pulis ang ilang gi-recruit.

Nagpadungog-dungog usab kini nga kung aduna may 800 ka pulis ang badlungon kaya kining mapulihan.

Dili pa lamang dugay mukabat sa 18 ka pulis ang nadismiss sa serbisyo sa rehiyon tungod sa nagkadaiyang kasong gi-atubang.

Giklaro usab sa PNP 10 nga walay naglihok nga “sex-for-freedom scheme”  sa rehiyon.

Reaksiyon kini ni Sereñas human sa taho sa matud pa pagpanglugos sa usa ka Pulis Maynila sa 15 anyos nga dalagita hulip sa kagawasan sa amahan nga nadakapan tungod sa iligal nga droga.

Hinoon gisiguro sa opisyal nga kung aduna man, dili usab nila kini e-tolerate.