Balita gikan sa RMN Malaybalay: Anti-mendicancy law, gipahimumdom sa DSWD 10
Nagpahinumdom ang Department of Social Welfare and Development kon DSWD Region 10 karong nagsingabot na ang Pasko kalabot sa Anti-Mendicancy law kon Presidential Decree No. 1563.
Sa interview sa RMN Malaybalay ngadto kang Charmaine Tadlas, information officer sa DSWD 10 gibutyag niini nga ilawom sa mao nga balaod bawal pagpabilin sa mga pamilya diha sa kadalanan aron manglimos.
Wala usab gidasig sa DSWD ang publiko nga muhatag sa mga manglimosay sa kadalanan tungod kay posibleng kanunay kining magbalik-balik aron mangayo.
Matud ni Tadlas nga kung dili kini tagaan, dili na usab kini mubalik sa kadalanan aron manglimos.
Kung gusto matud pa nga mutabang, mas maayo kining ipaagi ngadto sa mga institutions o kahugpungan nga adunay programa ngadto sa mga manglimusay.
Nakalatid sa balaod nga ang kanunay nga paghatag ug limos sa mga bata nakadaut, nagmugna sa ilang mga huna-huna nga dili na kinahanglan mutungha ug magtrabaho aron mukita hangtod kini hingpit nang mahimong kultura.
Nasayran nga hingtungdan silot sa mga manglimos ug mga muhatag ug limos.
Balita gikan sa RMN Iligan: Iligan’s Icon of Beauty Cathy Tan nakita nang daan ang kadaugan ni Catriona Gray sa Ms. Universe 2018
Anaa na kaniya ang tanan hinungdan nga midaug si Ms. Catriona Gray isip Ms. Universe 2018.
Kini mao’y gibutyag sa kanhi beteranang naghupot sa Ms. Iligan Beauty Pageant ingon man ang giilang Iligan’s Beauty Icon Cathy Tan dihang kampanti kaayo siya nga modaug sa maong kumpetisyon si Gray.
Gibutyag ni Tan nga angayan lang usab nga napun-an napud ug Ms. Universe holder ang nasud sa pilipinas sa ika-upat na kahigayon karong tuiga.
Kini gumikan gipangandaman gayud ug maayo ang pagsabak ni Gray sa maong kumpetisyon gikan sa iyang pagdaug sa Binibining Pilipinas hangtud na sa Ms. Universe Competition kagahapong adlawa.
Balita gikan sa RMN Butuan: The Wedding: Kanhi NPA gikasal sa Pari sa pulis
THE WEDDING: Gikan sa kalasangan, ngadto na sa simbahan
Mao kini ang sugilanon sa duha ka mga kanhi NPA nga nagkahigugmaay. Gikan sa pagtago-tago sa baga’ng kalasangan, karon nahiusa ra gyud sa salag sa kaminyoon ang duha ka mga kanhi sakop sa rebelding New Peoples’ Army (NPA) pinaagi sa “wedding ceremony” nga gipasi-ugdahan sa Police Regional Office (PRO) 13.
Gipahigayon ang seremonyas sa St. Ignatius de Loyola Chapel sa PRO 13 headquarters niadtong Sabado, pinaagi ni PCI Mark Virgil Ibardolaza, ang Regional Pastorla Officer sa PRO 13 uban usab sa presensya ni PNP Caraga Regional Director PCSupt. Gilberto DC Cruz, membro sa Regional Staff ug mga personahi sa kwerpo sa kapulisan.
Ang duha ka bag-ong magtiayon parehong kanhi sakop sa Guerilla Front Committee 21, sa NPA kinsa nagsurender sa Regional Intelligence Division niadtong Hulyo 27, 2018.
Libre ang tanang gasto sa kasal nga gi-sponsoran sa PRO 13 sama sa bridal gowns ug mga accessories, barong sa lalaki, floral decoration, wedding rings, cakes ug reception – isip suporta sa Enhanced Comprehensive Local Integration Program (E-CLIP) sa goberno.
Personal nga niabot sa pag-congratulate si PCSupt. Cruz sa duha ka magtiayon kinsa gipanalanginan ug duha ka mga anak.
Balita gikan sa RMN Gensan: 10th ID, wala pay nadawat nga imporasyon bahin sa permit to campaign sa NPA
General Santos City— Wala pay nadawat nga reklamo bahin sa permit to campaign ang 10th Infantry Division gikan sa mga pulitiko sa umaabot nga piniliay sunod tuig.
Sumala kang Major General Noel Clement, Commanding Officer sa 10th ID nga padayon ang ilahang ginahimo nga pagmonitor lakip na ang mga extorsion activity sa rebeldeng New People’s Army kon NPA ngadto sa mga negosyante.
Paniguro ni MGen. Clement nga dili nila tugutan nga gamiton sa rebeldeng grupo ang holiday season aron nga makapangwarta ngadto sa mga negosyante o mga pulitiko.
Nanawagan man usab si MGen. Clement ngadto sa pulitiko nga dili muhatag ug kwarta isip bayad sa permit to campaign gumikan ng maong kantiad ang dili gamiton alang sa ilahang kadaugan.
Kundili gamiton matud pa kini aron nga kalabanon ang gobyerno ug ipadayon ang ilahang mga terrorisic activity.
Busa awhag niini ngadto sa mga kandidato nga kung adunay bayad sa kinabuhio nakadawat ug mga pagpanghulga gikan sa rebeldeng grupo, makig-alayon matud pa sa kapulisan ug militar.
Balita gikan sa RMN Davao: Tulo ka langyaw na-missing
Davao City – Wala na kauli ngadto sa ilang pinuy-anan sa usa ka dormitory sa Circumferential Marfori ningsiyudad sa Davao ang tulo ka mga langyaw human na-missing alas-4:20 adlaw’ng Biyernes sa hapon.
Giila ang tulo ka mga langyaw nga sila si Monisha Eswaran, 21-anyos, dalaga, Mahalakshmi Vilvijayan, 21-anyos, dalaga ug laing usa ka Mohan Sundaram Vengadih, 21-anyos, ulitawo, pulos Indian national nga nagpuyo sa nahisgutang lugar.
Saysay ni Raquel Ana Marie Castro, supervisor sa maong dorm, nga samtang kini nagpahigayon og daily attendance niadtong tungora nadiskobrehan nalang nga wala na kabalik ang tulo ka langyaw gani wala usab masayod ang mga kakaubanan niini nga mag-upat na kaadlaw missing ang tulo.
Si Castro igo nalang sa pagdangop sa Presinto Dos aron magpatabang samtang ang kapolisan naglusad na og imbestigasyon kalabutan sa maong panghitabo.
