Nag-angkon sang madamo nga paso sa iya lawas ang isa ka asawa matapos nga gintutdan sang iya bana ang ila balay samtang yara sa sulod ang biktima sa Brgy. Bulata, banwa sang Cauayan bangud gid lamang nga nagpangayo ini sang kwarta halin sa ila social amelioration fund.
Ang biktima ginkilala kay Angelina Cabalida, 58 anyos, samtang ang suspek naman nakilala kay Leodigario Cabalida, 60 anyos, lunsay pumuluyo sang amo nga lugar.
Suno sa hepe sang Cauayan PNP, P/Maj. Lowell Garinganao nga hubog nga nagpauli ang suspek sa ila balay halin sa pagkuha sang ila ayuda sa 4Ps kag sang nagpangayo ang iya asawa, naakig ini, nagbaisay sila kag sang ulihi, nag-gwa ini kag gintutdan ang ila balay.
Pahayag sang pulis nga sang nakita sang asawa nga naga-daba daba na ang ila balay, nagtinguha ini nga makagwa pinaagi sa pagtaklas sa kisame sa diin bangud sang kakulba, nataranta ini kag wala na nakabatyag sa kalayo nga iya ginasulong.
Base sa imbestigasyon, sang ini ang nakita sang ila kaingud nga nakilala kay JR Bernardo, 50 anyos, nagtuyo ini nga buligan si Angelina apang ini siya ang ginlabo man sang suspek, naigo sa abaga kag ginabulong karon sa ospital, samtang nagsungka naman sa pulis ang suspek.
[image: image.png]
