Bana nagdangup sang problema sang iya asawa nga OFW sa Kuwait

20

Ang paghatag sang maayo kag masanag nga bwas-damlag para sa pamilya ang masami isa sa nagapanguna nga katuyuan sang mga Overseas Filipino Workers sa ila pagpadulong sa luwas sang pungsod agud nga magtrabaho.

Apang nagbaylo ang huyop sang hangin sa isa ka taga-Bacolod nga OFW sa Kuwait matapos nga ini siya kag ang 16 ka iban pa nga OFW ang halos 20 ka adlaw na nga wala trabaho kag yara lang sa paghinakup sang ila agency didto.


Si Loribel Perez, 39 anyos, residente sang Brgy. Taculing, Bacolod City ang nagpadulong sa DYHB agud magpangayo sang bulig para sa iya asawa nga si Marilou Perez, 38 anyos, isa ka OFW sa Kuwait.

Suno kay Loribel nga sang nagligad nga Agosto 2019 nagpadulong sa Kuwait ang iya asawa agud nga magtrabaho apang matapos ang 2 ka bulan naghalin ini sa iya una nga employer.

Gilayon naka-kita sang panibag-o nga obra si Marilou suno sa iya bana apang matapos ang isa ka bulan naghalin man ini bangud indi siya maka agwanta sa pag-trato sa iya sang iya amo.

Sa ikatatllo nga employer sang iya asawa didto na ini kag nagpang-indi nga mag-trabaho bangud halos 3 ka adlaw nga wala siya ginapakaon sang iya amo.

Bangud sini, nagpadulong sa ila agency ang iya asawa sadtong December 29 apang tubtub subong wala ini sang trabaho kag sa basement lang sang opisina sang amo nga agency sila ginapa-tiner.




Si Loribel ang gin-updan sang DYHB sa Public Affairs Office sang Negros sa diin ini sila ang gin-atipan ni Public Officer 3 April Joy Durana sa diin ang probinsya nagbutang assistance desk para sa kaangay nga mga problema.

[image: image.png]

Facebook Comments