ILOILO CITY- Wala na sang mas masakit pa sa isa ka asawa ang madakpan sa akto nga nagahampang sang kalayo ang iya bana.
Wala sang tinaga nga makalaragway sang kasakit nga nabatyagan. Daw ginalihap ang kasing-kasing. Pilit ginatampa ang kaugalingon sa paglaum nga makabugtaw sa bangungot nga damgo. Apang matu-od, malu-ib ang iya bana.
Priso karon sa karsel sang La Paz PNP station ang bana nga si Jonarie, 42 anyos, residente sang isa ka brgy. sang San Lorenzo, Guimaras. Sa tupad nga rehas, nahunong man ang babaye nga si Lanie, 39, kerida ni Jonarie.
Ang duha nadakpan sa akto sang asawa ni Jonarie nga si Marivic, 52, nga ara sa akto sa pagkuyab sang kalayo sang impyerno.
Sabado, Marso 25, 2017, nagkadto ang asawa nga si Marivic sa lugar nga ginapamandayan ni Jonarie sa Puerto Real Subdivision, La Paz agud magkuha sang sweldo para sa galastohon sang 6 nila ka mga kabata-an kag sa ila kinahanglanon sa panimalay.
Sang hapon na, ginhagad ni Marivic ang bana nga magpauli bangud wala sang obra sa balay nga ila ginapatindog kun adlaw nga Domingo.
“Ikaw lang Gha ang magpauli sa Guimaras kay may overtime kami sa amon ginaobra nga balay”, malulo nga alungay ni Jonarie kay Marivic.
Nagpauli ang asawa sa San Lorenzo, Guimaras sang gab-i apang indi mahim-os. Daw may tingog nga nagasunlog sa iya pinsar.
Nagasulod sa pinsar sini ang mensahe sa text sa cell phone sang bana nga iya nabasahan sang nagligad nga semana nga nagapaangga sang pagka-on. “Langga, dal-an mo ako sang pinamalhan nga aloy kag atsara, ha?”, mensahe sang babaye sa cell phone sang bana.
Ini nga text ang iya ginbalewala kag pahapyaw lamang nga ginpamangkot sa bana nga madasig man sang naulihi nga ginpanginwàla.
Apang sang Sabado, daw may lain nga nabatyagan si Marivic. Nadumdoman sini ang text sa cell phone sang bana halin sa babaye nga nagapadala sang pagkaon bangud indi man kusinero ang iya bana.
Gulpi lang daw may indi makita nga nagadikta kay Marivic. Gintawag sini ang isa niya ka bata, pakaisa kag duha ka hinablos nga lunsay armado sang cell phone.
Nag-arkila ang magpamilya sang masakyan pakadto sa pwerto sang Buenavista, Guimaras alas 7:30 sang gab-i. Maswerte naman nga ginlibre sila sang gin-arkilahan nga pump boat padulong sa Iloilo sang nahibalu-an ang ka-importante sang ila mission.
Pag-abot sa barracks sang mga construction workers nga ginatiniran sang bana sa Puerto Real, tuman ka linong.
Halos ang mahinay lang apang asud-asod nga ragitnit sang salog ang ila mabati-an halin sa sulod.
Preparado ang cell phone nga may camera sa pagkuha sang ebidensya.
Si marivic ang nagabitbit sang barateha agud hanuton ang sarado nga pwerta.
Hinali ginbunal ni Marivic ang pwerta agud indi makapreparar ang ara sa sulod. Mala-tokhang double barrel reloaded ang estilo nga ginhimo ni Marivic.
“Mga sapat kamo! Mga baboy!”, akig nga singgitan ni Marivic pagbukas sang pwerta.
“Picturi-picturi!”, mandu ni Marivic sa iya mga upod.
Ginbungkol sang barateha ni Marivic sa sobra nga kaakig si Lanie nga sadto nga ti-on ara nagapungko sa ibabaw ni Jonarie samtang ini ang nagahigda.
Suksok ni Lanie ang duster samtang nagapungko apang wala sang pang-idalum nga panapot pareho ni Jonarie.
“Andaman mo Marivic kun mahulogan si Lanie!”, akig nga hambal ni Jonarie sa asawa.
Si Lanie ang duha na ka bulan nga nagadala sang bunga sang ila ginpanggas nga pagpakasala.
Madasig nga nanimoron sang habol si Lanie.
Gintawgan ni Marivic sang pulis ang bana kag kerida sini kag ginpapriso.
Sa exclusive interview sang RMN Iloilo kay Marivic, maisog sini nga ginpanindogan nga kasohan ang bana kag ang kerida.
Si Lanie, residente sang Sibunag, Guimaras, may mga kabata-an kag may bana. Apang ang bana priso karon sa BJMP.
Kahapon, napasaka na sang asawa ang kaso nga paglapas sa Republic Act. 9262 ukon Anti-violence Against Women and Children Act, isa ka kaso nga may mabug-at nga penalidad.
Actual photo
Facebook Comments
