Nagapabuang-buang lang. Ini ang pahayag ni Edcil Mediona Basanta, angut sa iya amay nga si Eduardo Mediano, 58-anyos nga suspek sa pagpatay sa iya asawa nga si Priscila, 50, sa Purok 1, Brgy. Yao-yao, Cauayan, sang Enero 13.
Sang gin-interview sang DYHB News Team ang suspek nga yara karun sa kustodiya sang Cauayan Municipal Police Station, indi ini maistorya sang husto kag lain ang ginasabat sini sa mga pamangkot.
Apang sang si Edcil na ang gin-interview, nagsiling ini nga nagapabuang-buang lang ang iya amay agud nga makaluwas ini sa sa krimen gani indi ini dapat nga patihan. Suno pa kay Edcil, mismo ang iya bana ang ginhambalan sang suspek nga magbakal sang hilo sa ilaga kag ibutang sa tinapay kag ihatag sa iya, agud ini ang mapatay bangud suno diri, indi naman niya matapos ang pamatbat sa kaso nga parricide pagpatay sini sa iya asawa.
Mismo si Edcil ang nakasaksi man sa pagpatay sang iya amay sa ila nga iloy. Ginsaysay sa DYHB ni Edcil nga sang Disyembre 8, nagbalik sa Purok 1 ang iya iloy upod ang iya manghod kag nagkuha sang pila ka gamit, kag didto gintuyo na ini nga bun-on sang iya bana. Sang Disyembre 13 naman, nagbalik liwat sa Purok 1 si Priscila upod na si Edcil agud magpalista sa programa sang DSWD, kag didto ginhagad sila sang iya amay nga magpauli sa ila balay bangud nagatuyo siya nga mag-istorya.
Nag-istoryahanay ang mag-asawa apang sang ginpamangkot na ni Priscila kun diin na ang kwarta nga iya ginapadala, diri na kag ginbuno siya sang iya bana. Suno kay Edcil, makapila pa ka beses nga ginsagang sang iya iloy ang plamingko apang ginlaslas pa gid ni Eduardo ang iya liog.
[image: image.png]
