Davao City – Aduna nay subject o person of interest ang Digos City Police Station, Davao del Sur nga suspek sa pagpusil-patay sa chairman sa usa ka transport cooperative sa maong lungsod niadtong Miyerkules sa gabii (November 17, 2021).
Sa interbyu sa DXDC RMN Davao kang Police Lieutenant Colonel Hamlet Lerios, Officer-In-Charge ng Digos City Police Station, giila ang biktima nga si Ronald Sabandal, 50-anyos, residente sa Barangay Aplaya, Digos City, Davao del Sur ug chairman sa Digos Padada Transport Cooperative.
Saysay ni Lerios, gikan sa opisina ang biktima pauli sa iyang pinuy-anan sa dihang nahitabo ang insidente, diin nadunggan sa mga residente ang buto sa pusil ug nakit-an na lamang nga wala nay kinabuhi ang biktima.
Sa inbestigasyon sa kapulisan, ilang ginalantaw nga anggulo sa krimen mao ang bangi sulod sa ilang kooperatiba diin aduna matud pay ayuda nga gihatag ang Land Transportation Franchising and Regulartory Board (LTFRB) apan dili tanang miyembro ang nahatagan ug nakadawat niini.
“Daghang mga member nga nagreklamo. Naay ayuda ‘yung LTFRB. Naay mga member nga wala nahatagan og ayuda. Mao ‘tong ang iba nagreklamo, ang iba nagbagulbol. Naa siyay nakaaway. Mao ‘to ang dagan sa imbestigasyon nato,” matud ni Lerios.
Padayon pang gipalawman sa kapulisan ang inbestigasyon sa insidente ug ang pagkab-ot sa hustisya pinaagi sa pagsikop sa responsable sa krimen.
RadyoMaN Kirby Manzon
