Ginsug-alaw sang iya mga himata ang bangkay ni Joanna Demafelis matapos nga nag-abot pasado alas 5 kaina sang aga sa Iloilo International Airport.
Napuno sang tuman nga kasubo ang palibot sang paluparan sang ginpapana-og sa eroplano ang bangkay nga nasulod sa temporaryo nga lungon. Matapos ang pormal nga pagbatun sang pamilya sa bangkay sang ila himata gilayun ini nga ginderetso sa Somo funeral Homes sa banwa sang Ajuy.
Ginpahayag naman sang tagdumalahan sang punerarya nga buas pa posible nga ma dala sa ila balay sa barangay Ferraris, Sara, Iloilo si Joanna bangud sa malawig nga proseso sang embalsamasyon. Makit-an naman ang simpatiya sang mga Ilonggo nga nag-guwa sa tagsa nila ka panimalay para magsaksi sa paglabay sang bangkay sang ila kasimanwa.
Nahibalu-an nga nakit-an sa sulod sang frezzer ang bangkay ni Demafelis nga ginapatihan ginkastigo tubtob mapatay sang iya mag-asawa nga amo sa Kuwait.
