ISABELA, NEGROS OCCIDENTAL – Isa patay 3 napilasan sa away sang duha ka pamilya sa Brgy. Cabcab, banwa sang Isabela kagab-i.
Nakilala ang biktima nga napatay nga amo si Noel Perez, 60 anyos ang edad samtang napilasan naman tuga sang pagtiro, labo kag buno sanday Rodolfo Perez, 49 anyos ang edad kag ang mag-tiyo nga sanday Nolibert Pader, 50 anyos kag Mark Anthony Pader, 23, lunsay pumuluyo sang amo nga lugar.
Suno sa imbestigasyon sang Isabela PNP, natabo ang insidente may mga las 7:30 kagab-i matapos nga naakig ang pamilya Perez bangud sa ila alegasyon nga may naghaboy sang bato sa ila atop.
Ginsuspetsuhan sang mga Perez nga ang pila ka miembro sang pamilya Pader ang may kahimuan sa pagbato sang ila balay rason nga ini ang ila ginsukmatan kag ginhangkat away.
Nag-gwa sa iya balay si Rodolfo nga hubog, may bitbit nga kutsilyo kag didto na nagsugod ang paglinalisay tubtub nga natabo ang pagtiro kag naigo si Rodolfo.
Ang biktima naman nga napatay nga si Noel Perez, nga hubog sa amu nga tion ang nag-angkon sang labo kag buno apang indi na karon matumod pa kon sin-o sa ila ang nakapatay sa iya. Siya ang nag-attempt nga labuon si PO2 Untal apang maswerte nga nakalikaw ang pulis.
Sang nag-usisa ang mga pulis nagagwa nga indi gali bato ang nagtupa sa atop sang mga Perez kundi may nahulog gid lamang nga indian mango.
Nahibaluan nga si Rodolfo Pader ang natiruhan ni PO2 Janet Untal, assigned sa Isabela PNP WCPD, sang nagpacify ini sa iniway sang iya manlang mga kaingod.
Sa karon ginadula na sang utoridad ang motibo sang pamolitika ang rasun sa amo nga insidente, baliskad sa mga nagalagaw nga balita./dyHB BACOLOD
