PONTEVEDRA, NEGROS OCCIDENTAL – (UPDATE) Nagresulta sa kamatayon sang duha ka mga drayber ang natabo nga pagbungguanay sang isa ka Fortuner kag isa ka traysikol kahapon sang aga sa Brgy. Antipolo, banwa sang Pontevedra.
Nakilala ang mga biktima nga nagkalamatay nga amo sanday Jesus Onlagada, 51 anyos, residente sang Brgy. Poblacion, Hinigaran, driver sang traysikol kag ang driver sang Fortuner nga si Evelyn Baguna, 35 anyos, pumuluyo Altachera Village, Jaro, Iloilo City.
Suno sa imbestigasyon sang Pontevedra Municipal Police Station ang insidente natabo may mga las 7:25 kahapon sang aga (April 23) sa boundary sang Had. Amorabita kag Sitio Sutay, Brgy. Antipolo, Pontevedra.
Ginpahayag sang pulis nga ang Fortuner naghalin sa La Castellana kag sang nag overtake ini, nabungguan niya ang traysikol nga naghalin naman sa proper sang Brgy. Antipolo agud mag deliver sang manok.
Wasak ang unahan nga bahin sang Fortuner kag nagbaliskad ini sa kampo nga nagadalum sang anum ka tapak, samtang, nagupi naman ang sidecar sang traysikol kag wasak ang ulo sang motorsiklo kag nahulog man sa tupad sang Fortuner.
Nahibaluan nga ang Fortuner may mga pasahero man kag nag-angkon sang menor nga pilas kag nakilala nga sanday Leonardo Opelario, 69 anyos, amay sang driver, residente sang Victorias City kag ang duha ka mga kabataan ni Baguna nga amo sandasy Kyla, 9 anyos kag Rigil Kenneth, 4 anyos.
Gindala sang Pontevedra Rescue Unit ang duha ka mga biktima sa Valladolid District Hospital apang gin-declare dead on arrival si Baguna, samtang, ang drayber naman sang traysikol ang ginsaylo sa Regional Hospital apang sang ulihi, nagtaliwan man.
Ang nga sakay sang Fortuner ang luwas naman sang gindala sa Valladolid District Hospital./DYHB BACOLOD
