BACOLOD CITY – Bangud gid lamang sang isa ka mansanas, lalaki napatay kaina sang kaagahon MO2 Ice Bar sa Brgy. Mandalagan, Bacolod City.
Nakilala ang biktima nga si Wilmar Villacapa, 26 anyos ang edad, pumuluyo sang Brgy. Tangub ciudad sang Bacolod.
Ang insidente natabo mga las 4:20 kaina sang kaagahon sa area malapit sa MO2 Ice sa Brgy. Mandalagan kon diin na-tripan sang biktima nga hubog nga magkuha sang isa ka mansanas kag nagdalagan.
Sandig sa pahayag sang amigo sang biktima, ginlagas sang security guard si Villacapa kag ginsugata kag ginbanggaan sang isa ka lalaki nga amo ang suspek nga naglampos sang kahoy sa biktima.
Suno naman sa version sang isa ka vendor nga yara sa amo nga lugar sang natabo ang insidente, ang biktima ang ginlagas sang security guard kag ginsipa rason ini natumba kag naigo sa baldosa.
Ang biktima nag-angkon sang pilas sa iya tuo nga ulo kag dali-dali nga gindala sa Corazon Locsin Montelibano Memorial Regional Hospital apang gin-declare nga dead on arrival sang attending physician nga si Dr. Christine Pasyente mga las 5 sini man nga kaagahon./dyHB BACOLOD
