CALATRAVA – Patay ang isa ka lalaki matapos nga gintiro ini sang makapila ka beses pasado las otso kagab-i (August 18) sa Sitio Sangay, Barangay Hilub-ang, Calatrava.
Nakilala ang biktima kay Diosdado Margaha, 42 anyos, single samtang ang suspek naman amu si Elmer Tordesillas, 48 anyos, may asawa, tanan sang amu man nga lugar.
Nakabaton sang tawag ang Calatrava PNP paagi kay Kapitan Gloria Catallopa mga las 8:30 kagab-i nga may insedente sa amu nga lugar, rasun nga ginrespondehan ini sang PNP apisar nga mga 35km ang kalayuon sini halin sa banwa.
Nakaguwa nga motibo sa imbestigasyon sang Calatrava PNP amu ang mainit nga nilalisay sang duha tubtob nga nagkuha sang iya .45 kalibre nga pistola si Tordesillas kag gintiro sang makapila ka beses si Margaha.
Igo ini sa nagkalain lain nga bahin sang iya nga lawas rasun nga gindala pa sa Calatrava District Hospital apang ginpronounced nga dead-on-arrival.
Arestado naman ang suspek kag ara karon sa prisuhan sang Calatrava PNP.
