BACOLOD CITY – Ginaalegar nga ginpulihan kastigo sang mag-asawa ang isa ka tigulang kagab-i sa Brgy. 35, Bacolod City.
Nakilala ang biktima nga si Nicolas Salido, 75 anyos ang edad, pumuluyo sang Purok Mapinalanggaon, Brgy. 35 sining ciudad.
Samtang ginkilala naman ang mag-asawa nga sanday Johanna kag Erick Serias, lunsay may legal nga edad kag pumuluyo sang amo nga lugar.
Suno sa biktima nga may mga las 6 kagab-i, ini siya ang nagkadto sa balay sang mag-asawa agud nga i-uli ang suga apang may natabo nga indi paghangpanay sa tunga nila sang mag-asawa tubtub nga naglab-ot sa pagbayluhanay sang mga tinaga.
Ginpahayag sang biktima nga hinali na lamang ini siya ang ginkastigo sang amo nga mag-asawa rason nga nag-angkon ini sang madamo nga lagob sa pila ka bahin sang iya lawas.
Samtang, sa bahin naman sang mag-asawa nga Johanna kag Erick, ila ginsiling nga naglalisay gid man sila ni Salido kag nauna ini nga nagkuha sang bato kag gintuyo nga ilampos sa ila.
Ginsiling sang mag-asawa nga ginhambalan pa sila sang complainant nga “ ka g-a-g-o kag ka g-a-g-a sa inyo.”
Kaangay ni Salido, ang mag-asawa nga Serias ang nagpadulong man sa Police Station 1 agud nga magpa blotter./dyHB BACOLOD
