Ginpaidalom na sa state of calamity ang duha ka mga banwa sa probinsya sang South Cotabato tungod sa mataas nga kaso sang balatian nga dengue matapos nga aprobahan sang Sangguniang Bayan sini ang rekomendasyon sang Municipal Disaster Risk Reduction and Management Council.
Ang nasambit nga mga banwa amo ang Surallah kag Tantangan nga pareho nga may mataas nga kaso sang balatian nga dengue kag may tatlo ka mga barangay nga nagdeklarar sang state of calamity tungod sa dengue outbreak.
Ginkumpirmar ni Vice Mayor Timee Joy Torres-Gonzales nga subong nga semana nila nga regular session gin-aprobahan ang deklarasyon base naman sa rekomendasyon sang MDRRMC.
Sa datos nagalab-ot sa 336 ang kaso sang dengue sa banwa nga mataas sang 300 percent sa kapareho nga period sang nagligad nga tuig nga nagalab-ot lang sa 84 Enero tubtob Hunyo 29.
Ginpahayag niya nga base sa rekomendasyon ang immediate action nga himuon amo ang clean-up drive kag pagbakal sang fogging machine agud maprebentar ang pagsaka sang kaso sang balatian nga dengue sa banwa.
Samtang sa banwa sang Surallah suno kay MDRRM Action Officer Leonardo Ballon gilayon man nga gin-aprobahan sang Sangguniang Bayan ang pagpaidalom sa banwa sa state of calamity matapos nga naglab-ot sa masobra 400 ang kaso kag apat ang narekord nga patay.
Ginpahayag niya man nga lakip sa himuon ang food for work para sa clean-up drive, pagbakal sang chemical para sa fogging operation kag subong man dengue NS1 kit para rapid test.
Ginkumpirmar man ni Ballon nga nagapadayon naman ang anti-dengue campaign sang mga barangay sa banwa.
May-angot sini, posible pagapungkuan naman sang PDRRMC kon bala kinahanglan na nga ipaidalom ang probinsya sa state of calamity tungod sa balatian nga dengue matapos nga duha na ka banwa ang nagdeklarar.
