Davao City – Magkapareho ang lantaw sa duha ka mga barangay kapitan sa unang distrito syudad sa Davao kabahin sa hisgutanang i-anunsyo sa publiko ang giingong narco list aron masayran sa mga botante kung kinsa kadtong buot magpapili apan gidudahang nahilambigit sa gidiling droga.
Gibutyag ni Brgy. 76-A Bucana Barangay Kapitan Rolando Trajera nga klarohon lang usab sa mopagawas sa mga pangalan nga seguradong adunay kalambigitan sa droga ang mga anaa sa talaan.
Samtang gisulti usab ni Brgy. 9-A Poblacion Barangay Kapitan Tata Llubit nga apilon ang mga kasamtangang opisyal sa paghibalo sa publiko aron masayran sa mga botante kung kinsa sila aron dili i-boto.
Pabor usab si Llubit nga himoong mandatory ang drug test isip requirement sa mga buot mopapili sa Mayo 14 nga piniliay sa barangay.
Sa pikas bahin dako usab nga uyon si Trajera nga himoong rekwisito ang drug test sa mga mokandidato sa Barangay ug SK Elections karong Mayo 14.
RadyoMaN Bernard Pantallon
