Ang Barangay Indahag maoy pinaka-unang Barangay nga nakahurot sa gi-andam nga mga tickets sa dxCC-RMN Cagayan de Oro atol sa dxCC-RMN Live sa Barangay.
Nahurot ang 400 ka tickets nga gi-andam sa dxCC alang sa mga magparehistro aron mosaksi sa Live Program sa Straight to the Point- Kuskos Batikos ni RadyoMaN Zaldy Ocon.
Gani, duna pay daghan nga naghangyo nga makarehistro aron makapahimulos usab sa mga serbisyo nga gitunol sa lokal nga kagamhanan sa Cagayan de Oro human sa live program diin napaabot sa katawhan ang ilang mga hangyo ngadto sa mga opisyales sa barangay ug syudad.
Lakip sa mga serbisyo nga napahimuslan sa katawhan sa Barangay Indahag ang libreng medical check-up, libreng ibot sa ngipon, libreng binhi sa mga prutas ug utanon, libreng rabbies vaccination sa mga iro, libreng Philhealth registration, libreng rehistro sa mga walay birth certificate, libreng tambal, libreng arroz caldo, libreng snacks ug uban pa.
Alayon niini, dako ang pasalamat sa dxCC-RMN sa lokal nga kagamhanan sa pagpanguna ni Mayor Oscar Moreno ug mga barangay officials sa Barangay Indahag sa pagpanguna ni Kapitana Jocelyn Dahino sa maong kalampusan.
Niabot na sa upat ka barangay ang nabisita sa dxCC-RMN ning bulan lamang sa Setyembre nga naglakip na sa Barangay Cugman, Barangay Puerto, Barangay Patag ug kagahapon sa Barangay Indahag.
Karong Sabado, mobisita na usab ang dxCC-RMN sa katawhan sa Barangay Camaman-an ning syudad.
