Nag-sumiter sang iya resignation ang punong barangay sang Brgy. Tinongan banwa sang Isabela bangud sang mga akusasyon sang rebelding NPA batuk sa iya kag pagsulod sang mga ini sa iya puluy-an sang nagligad nga Miyerkules sang gab-i.
Si Brgy. Kapitan Eugene “Harley” Zambrona sang Brgy. Tinongan ang nagpadulong sa DYHB kag personal nga nagpalayag sang iya bahin angut sa iya pagfile sang resignation nga iya na na-submit kay Isabela Mayor Irene Montilla kag sa DILG Isabela.
Ginpahayag niya nga nag-resign siya matapos gina-akusahan sang Leonardo Panaligan Command (LPC) sang NPA nga nagapang-taya sang armas, protector sang illegal nga druga kag nagpa-armas sa mga tanod.
Suno kay Zambrona nga para sa safety sang iya pamilya kag para sa kalinong, nagdesisyon na lamang ini nga mag-biya sa iya pwesto.
Madumduman nga sadtong November 20, 2019 las 6 sang gab-i ginsulod sang tropa sang LPC-NPA ang puluy-an ni Zambrona sa tuyo nga arestuhon ini kag dis-armahan.
Sa press statement nga ginpagwa sang LPC-NPA pinaagi sa spokesperson sini nga si Ka JB Regalado, ila ginsiling nga nagapangatubang sang kaso sa Rebolusyonaryong Korte sang Pumuluyo ang amo nga barangay kapitan.
[image: image.png]
