Malungon, Sarangani Province—patay ang usa ka opisyal sa Barangay ug usa pa ka kaubanan niini samtang pito ang angol sa nahitabong pagbangga sa usa ka Fortuner ug Bus sa Sitio Bankerohan, Barangay Banate, Malungon, Sarangani Province alas 10.00 ang takna kaganinang buntag.
Biktimang nakabsan nailhang si Vladen Silver Orbisido, 33, barangay councilor sa barangay Poblacion, Polomolok, South Cotabato ug Enriquita Reyno, 73, residenti gihapon sa Baranagy Poblacion, Polomolok.
Angol silang si Mark Gabriel Lozano, Sandra Saletañez, 33, Vanessa Mira Ybañez, 7 anyos, Christian Bisya, teacher ug Samuel Charles Pascua, pulos taga Polomolok.
Sumala ni Police Sr. Inspector Richard Pabalinas, hepe sa Malungon Municipal Police Station nga basi sa ilang inisyal nga Imbistigasyon nasuta nga gikan ug Butuan City ang mga biktima ug pauli na unta sa Polomolok.
Pag abot sa Sitio Bankerohan, miovertake ang fortuner nga gisakyan sa mga biktima ngadto sa gisundan nilang sakyanan. Apan wala gilayon makabalik sa ilang lane ang mga nahisgutan hinungdan nga wala gyud nila malikayan ang kasugat nga bus nga iyaha sa Minadanao Star nga padulong usab sa syudad sa Davao.
Head on ang pagsungag sa duha ka mga sakyanan nga miresulta sa grabeng pagkayupi sa Fortuner.
Gidala ng biktimang si Enriquita sa Malungon Municipal Hospital apan gideklara kining dead on arrival. Samtang si Orbisido gidala sa SOCSARGEN Hospital dinhi sa Gensan apan nakabsan gihapon sa iyang ginabuhi.
Nakaangkon usab ug mga samad ang lima pa nila ka mga kaubanan kansa nagpabilin karon sa ospital.
Sa karon padayon pa ang imbistigasyon sa kaso samtang ang bus nga nakaengkwentro sa mga nahisgutan apil na ang driver niini ang anaa karon sa kustudiya sa Malungon Municipal Police Station.
