BACOLOD CITY – Ginpa-blotter sang isa ka barangay kagawad sang Brgy. Mansilingan ang secretary sang ila barangay matapos ini siya ang ginkuhaan sang lamesa sa opisina kahapon sang aga.
Nagpadulong sa istasyon sang pulis si Barangay Kagawad Ma. Socorro Pane Gauzon, 47 anyos, residente sang Bakyas, Laurel, Brgy. Mansilingan agud i-reklamo ang ila barangay secretary nga si Edward ‘Batok’ Meneses.
Suno kay Gauzon nga may mga las 9 kahapon sang aga, iya nadiskubrehan nga wala na ang iya lamesa sa sulod sang barangay hall.
Sa iya pagpamangkot, nahibaluan sang complainant nga ginpull-out sang sikretaryo sang barangay ang iya lamesa.
Pahayag pa ni Gauzon nga sang iya gin-confront si Meneses, ginhambalan pa siya nga “ pwede ka man maka-pungko sa kay Kapitan nga pulungkuan.”
Bangud sini, nahuy-an gid siya suno sa kagawad gani iya pormal nga ginreklamo sa pulis ang ila barangay secretary.
Wala pa nakahatag sang iya komento ang natungdan nga Barangay Secretary. /dyHB BACOLOD
