BACOLOD CITY – Anum sa karon ka barangay sa ciudad sang Bacolod ang hugot nga ginabantayan sang kapulisan bangud nga ginakabig ini sang COMELEC nga ‘elections areas of concern’.
Suno sa spokesperson sang Bacolod City Police Office – Senior Inspector Armilyn Vargas, nabaton nila kahapon ang listahan halin sa COMELEC Bacolod angot sa anum ka mga barangay nga ‘areas of concern’ bangud man sa intense political rivalry.
Ini nga mga barangay ginalakipan sang Brangay Alangilan, Estefania, Brgy. Villamonte, Banago subong man Brgy. Mansilingan kag Bata.
Sa pihak nga bahin, subject naman para sa validation ang mga barangay sa probinsya sang Negros Occidental nga nalakip sa listahan sang Philippine National Police bilang probable areas of concern para sa palaabuton nga May 14 barangay kag SK elections.
Nahibaluan nga kapin sa 95 sa 601 ka mga barangay sa Negros Occidental ang nalakip sa listahan sang PNP bilang probable hotspots durante sang eleksyon.
Suno sa spokesperson sang Negros Occidental Police Provincial Office, P/Insp. Charmae De Paz nga ini nga mga barangay ang ginalantaw bilang hotspots bangud sa pamahug sang armado nga grupo ilabi na sang NPA, election-related incidents ukon may yara sang intense political rivalry.
Pila sini nga mga lugar nga nalakip sa listahan ang yara makita sa kabarangayan sang Calatrava, Moises Padilla, Toboso kag Isabela.
Apang ini nga mga lugar ang ginapaidalum pa karon sa validation sang Joint Peace Security Coordinating Center nga ginalakipan sang Armed Forces of the Philippines, Philippine National Police kag sang Commission on Elections.
Angut sini, giklaro ni De Paz nga ang Commission on Elections sa gihapon ang makadesisyon sini./dyHB BACOLOD
