Davao City – Sukad nahimong pamuno-nasud si Pres. Rodrigo Duterte mas nag-aktibo pa ang Barangay Anti-Drug Abuse Council (BADAC) sa kabarangayan sa nasud sama sa Barangay Sto. Niño Tugbok ning siyudad.
Sumala ni Barangay Sto. Niño Kagawad Tata Alberto nga sa panahon na ni Duterte grabe ka-aktibo ang mga programa sa BADAC kontra droga sa mga barangay sama sa ilahang lugar.
Dili sama sa panahon ni kanhi Pres. Benigno Aquino III nga usad-pagong ang kalihukan sa BADAC ug mas nigara ang mga nalambigit sa iligal nga droga.
Giingon ni Kagawad Alberta nga sento porsento gisuportahan sa barangay council ang programa sa BADAC kay buot nila nga matuldokan ang suliran sa droga sa ilang barangay.
Kung unsa man ka labad ang mga batan-on nga nalambigit sa droga sa ilang barangay kaniadto apan karon wala na gumikan sa grabe ka aktibo sa BADAC.
Gani, daghan sa mga batan-on nga kanhi nalunod sa bisyo sa droga nitahan sa barangay human sila naagni sa kaanindot sa mga programa sa BADAC.
Alayon niini, dakong uyon si Kagawad Tata Alberta sa pagpasaka og kaso sa mga barangay opisyales nga walay pagpakabana sa pag-activate sa BADAC.
Sanglit walay rason ang mga barangay opisyal aron dili nila pakusgan ang BADAC hilabi na ang direksyon sa nasudnong gobyerno mao ang pagputol sa punuan sa droga ug kini mag-una sa grassroots level.
Apan kun apil gani sa illegal nga kalihukan ang mga anaa sa barangay naturalmente pod dili gayod nila i-activate ang BADAC aron maprotektahan ang ilang mga kaugalingon ug dili sila makalabuso.
Gidasig karon ni Tugbok District Brgy. Sto. Nino Kagawad Tata Alberta ang ubang mga barangay nga i-activate na ang ilang badac aron dili sila madudahan nga protector sa sindikato sa droga o dili ba kaha apil sa ilegal nga kalihukan.
RadyoMaN Joel Viray
