Kalibo, Aklan — Nakibot rong sangka estudyante matapos nga madiskubrehan nga imaw ra hay tinakawan sa sueod mismo it Kalibo Cathedral kahapon.
Nakilaea rong biktima kay Janelle Kym Lalic, 20-anyos ag taga Joyao-Joyao, Numancia, Aklan.
Sa panaysayon it biktima sa Kalibo PNP nga napan-uhan nana nga uwa eon ro anang wallet sa sueod it shoulder bag matapos nga imaw nagkalawat.
Sueod ko nasambit nga wallet rong kwarta nga 3,000 pesos, ATM Card ag iba pang dokumento.
Samtang sa ginpatigayon nga imbestigasyon it Kalibo PNP ag sa pag review it CCTV Footage it simbahan hay nakita ro sangka babaye nga nagbukas ko shoulder bag it biktima ag ginbuoe ro wallet.
Madasig man nga nagpaeagyo ro suspek nga uwa pa makilaea matapos rong insidente.
Padayon pa makaron ro ginapatigayon nga imbestigasyon it Theft and Robbery Section kung Kalibo PNP.
