General Santos City— Gi-angkon karon ni NFA Provincial Manager Dionesio Hectin Jr., nga usa sa mga rason nganong adunay kakulangon ug supply sa NFA sa Pilipinas mao ang dili buot mubaligya kanila ang mga mag-uuma ug humay tungod sa barato nga palit niini tandi sa mga rice trader.
Sumala pa ni Hectin nga 17 pesos kada kilo lang ang palit sa NFA sa mga mag uuma samtang ang mga private trader muabot ngadto sa bayte pesos hinungdan nga mas pillion sa mga mag-uuma nga ibaligya ngadto sa mga rice trader ang ilahang mga harvest nga humay.
Gisugyut na usab matud pa sa NFA Central Office nga patas-an ang palit sa mga bugas ngadto sa mga mag uuma apan wala kini gitugutan sa NFA Council tungod kay ug paliton matud pa sa NFA ang bugas sa mas taas nga presyo mas mag mahal ang kilo sa bugas sa NFA ingon man magpataas usab ug presyo sa mga rice trader aron nga sa ilaha gihapon ibaligya sa mga mag-uuma ilahang mga palay.
Gawas niini nagrekomenda na usab matud pa ang NFA nga nga mag import na ug bugas aron nga masolusyunan ang kakulangon sa NFA rice sa nasud ug kung asa mukabat sa 350,000 metric tons ang ilahang naunang request apan anaa lang sa 250, 000 metric tons ang gi-aprubahan ug bulan pa sa Hunyo kini gilaumang muabot.
